ஆப்கன் அதிபரின் மூத்த ஆலோசகர் படுகொலை

ஆப்கன் அதிபர் ஹமீத் கர்சாயின் மூத்த ஆலோசகர் ஒருவர் காபூலில் உள்ள அவரது வீட்டில் படுகொலை செய்யப்பட்டதாக பொலிஸ் செய்தித்தொடர்பாளர் தெரிவித்தார்.

உரூஸ்கான் மாகாணத்தின் முன்னாள் ஆளுநரான ஜான் முகமது கான் அதிபரின் முக்கிய ஆலோசகராக செயல்பட்டு வந்தார்.
அவரும், அவரைப் பார்ப்பதற்காக வந்திருந்த உரூஸ்கான் எம்.பி முகமது ஹாஷீம் வாதன்வால் என்பவரும் ஒரு குழுவினரால் படுகொலை செய்யப்பட்டதாக பொலிசார் தெரிவித்தனர்.
ஒரு வாரத்துக்கு முன்பு அதிபரின் சகோதரர் அகமது வாலி கர்சாய் அவரது நெருங்கிய நண்பர் ஒருவரால் படுகொலை செய்யப்பட்ட நிலையில் தற்போது அதிபரின் ஆலோசகரும் கொல்லப்பட்டுள்ளது குறிப்பிடத்தக்கது.